வீட்டுக்கு பூட்டு எது பெஸ்ட்

எவ்வளவு பெரிய வீட்டை கட்டினாலும் அதற்கு பாதுகாப்பு ஒரு சின்ன பூட்டு தான். இப்போது தொழில்நுட்ப திறமை வாய்ந்த திருடர்கள் பெருகியுள்ள காலத்தில் திண்டுக்கல் பூட்டை நம்பி எல்லாம் நாள் கணக்கில் வீட்டை பூட்ட முடியாது. தற்போது கதவுகளுக்கான நவீன பூட்டுக்கள் பயன்பாட்டிற்கு வந்து விட்டன. சிலிண்டரிக்கல் டோர் லாக், எலக்ட்ரோ மேக்னடிக் லாக், பேனல் லாக், அல்ட்ரா பர்னிச்சர் லாக் என ஏகப்பட்ட வகைகளில் பூட்டுகள் வந்து விட்டன. அந்த காலத்தில் தொங்கும் பூட்டுகளில் ஒரு லாக் மட்டுமே இருக்கும். 
ஆனால் இந்த கால பூட்டுக்களில் இரண்டு, மூன்று லாக் அடுத்தடுத்து இடம் பெறுகிறது. அலுமினியம், மெட்டல், கோல்டு கோட்டிங் பூட்டுக்கள் விற்பனையாகிறது. தேக்கு மர கதவில் 5 இன்ச் ஆழத்திற்கு துளையிட்டு லாக் பிட்டிங் செய்கிறார்கள். இந்த பிட்டிங்கை தனியாக கழற்றி எடுக்க முடியாது. மெயின் கதவுக்கான கைப்பிடியுடன் கூடிய பூட்டு (செட்டாக) ஆயிரம் ரூபாய் முதல் 10 ஆயிரம் ரூபாய் வரையிலும், படுக்கை அறை, உள் அறைகளுக்கான கைப்பிடி பூட்டுக்கள் 500 ரூபாய் அளவில் இருந்தும் விற்பனையாகிறது. 
பிங்கர் பிரின்ட் பூட்டுகளும் விற்பனைக்கு வந்து விட்டன. இந்த வகை பூட்டுகள் வங்கி லாக்கர், ரகசிய அறைகளுக்கு மட்டுமே பயன்படுத்தப்படுகின்றன. யார் விரல் ரேகை பதிவு செய்யப்பட்டிருக்கிறதோ அவர் மட்டுமே அந்த பூட்டை திறக்க முடியும். இல்லாவிட்டால் ரகசிய எண்ணை பதிவு செய்தும் பூட்டை திறக்கலாம். இந்த வகை பூட்டுக்கள் 5 ஆயிரம் ரூபாய்க்கு அதிகமான விலையில் விற்பனையாகிறது.